Lia Uluk Fohon
Rai Lian
1 Uluk fohon, Maromak nase'i lale'an no raiklaran.
2 Raiklaran sei la dadi dauk, sa-saa hotu-hotu sei nahutan karin. Wee mak iha, mais nakukun luri taka nola tomak. Maromak Kmalar*
1:2: Lia fuan Ibrani ne'e, bele na'ak ‘Maromak Kmalar’, lale ‘Anin nosi Maromak’, lale ‘Maromak beran’. laleok iha wee fohon nia.
3 Hotu, Maromak katak na'ak, “Musti noo kroman.” Katak notu, kroman moos dadi.
4 Naree kroman nia, Maromak neon boot, tan saa mak Nia nase'i nia, kabaas tebes. Hotu, Nia naketak kroman no kukun, ida-idak no oras du'uk.
5 Nia nanaran kroman na'ak, ‘loron’, nakukun na'ak, ‘kalan’. Hodi nunia, dadi loron no kalan. Lia nia mak Maromak nalo baa loron dala uluk.
6-7 Hotu, Maromak katak tenik na'ak, “Musti noo fatin mamuk atu hodi keta fa'e wee, nebee noo wee iha leten no wee iha ohak.” Katak notu, wee moos naketak aan fa'e baa rua.
8 Maromak nanaran fatin mamuk iha leten na'ak, ‘lale'an’. Lia nia mak Maromak nalo baa loron dala rua.
9 Hotu, Maromak katak tenik na'ak, “Wee iha ohak musti naklibur aan fatin ida, nebee noo rai maran!” Katak notu, rai maran moos dadi.
10 Nia nanaran rai nia na'ak, “rai maran”. Nanaran wee klibur nia na'ak, “tasi”. Naree nunia, Maromak neon boot, tan saa mak Nia nase'i nia, kabaas tebes.
11 Hotu, Maromak katak tenik na'ak, “Rai maran musti natubu ai horis mahoo fuan, mahoo musan, no mahoo tahan matak. Nebee ai horis ida-idak nafini, tuir oik du'uk.” Katak notu, ai horis moos dadi.
12 Iha rai maran ai horis sia nafini, tuir oik ida-idak. Naree nunia, Maromak neon boot, tan saa mak Nia nase'i nia, kabaas tebes.
13 Lia nia mak Maromak nalo baa loron dala tolu.
14-15 Hotu, Maromak katak tenik na'ak, “Iha leten musti noo makroman oi-oik, nebee bele naroma raiklaran! Musti noo makroman baa kalan, no makroman baa loron. makroman nia sia dadi tadak nebee bele sura loron no tinan.” Katak notu, makroman sia moos dadi.
16 makroman boot, oik rua. Mak boot liu nakroma baa oras loron; ki'ik nakroma baa kalan. Maromak moos nase'i fitun sia,
17 no babilan makroman nia sia iha lale'an, nebee naroma raiklaran
18 baa kalan no loron. Hodi nunia, kroman naketak nosi makukun. Naree nunia, Maromak neon boot, tan saa mak Nia nase'i nia, kabaas tebes.
19 Lia nia mak Maromak nalo baa loron dala haat.
20 Hotu, Maromak katak tenik na'ak, “Musti noo makmoris iha wee laran. No manu mak semo iha leten.”
21 Hotu, Maromak nase'i makmoris iha wee laran. Nia moos nase'i manu mak semo iha leten. Naree nunia, Maromak neon boot, tan saa mak Nia nase'i nia, kabaas tebes.
22 Maromak natuun matak-malirin baa sia hotu-hotu na'ak, “Makmoris iha wee laran musti bea tu'an, nebee nakonu nola wee iha fatin hotu-hotu! Manu iha leten moos musti bea tu'an!”
23 Lia nia mak Maromak nalo baa loron dala lima.
24-25 Hotu, Maromak katak tenik na'ak, “Musti noo makmoris iha rai maran! Nu'u osa no lotuk mak hakiak, osa no lotuk mak fuik, no osa no lotuk mak mane'ek. Ida-idak tuir niakaan oik du'uk!” Katak notu, sia hotu-hotu moos dadi. Naree nunia, Maromak neon boot, tan saa mak Nia nase'i nia, kabaas tebes.
26 Hotu, Maromak katak tenik na'ak, “Di'ak liu, Ita hase'i ema tuir Itakaan ilas, nebee sia babilan na'an tasi iha tasi laran, manu iha leten, osa no lotuk hakiak no osa no lotuk seluk sia iha rai maran.”✡
1:26: Kolose 1:16
27 Hotu, Maromak nase'i ema tuir Niakaan ilas. Nia nase'i sia, feto no mane.
28 Hotu, Nia natuun matak-malirin baa sia na'ak, “Emi musti bea tu'an, nebee hakonu hola no babilan raiklaran ne'e. Ha'u klatan beran hodi babilan na'an tasi iha tasi laran, manu ai leten, no osa no lotuk hotu-hotu iha rai maran.
29 Ha'u moos latan baa emi hahaak oi-oik iha raiklaran. Ne'e mak, ai horis mahoo fuan no mahoo musan.
30 Ha'u klatan no ai horis mahoo tahan matak oi-oik bodik osa no lotuk haan. Noo haan bodik osa no lotuk hakiak, osa no lotuk fuik, osa no lotuk mane'ek no manu ai leten.” Katak notu, hahaak hotu-hotu moos iha.
31 Naree nunia, Maromak neon boot, tan saa mak Nia nase'i nia, kabaas tebes. Lia nia mak Maromak nalo baa loron dala neen.