Kristus eman musti moris moos hodi hadomi malu
1 Ita ne'e Na'i Maromak oan mak Nia nadomi. Tan lia nia, ita musti haninu baa Nia.
2 Ita musti hadomi malu, hanesan Kristus nadomi ita. Nia latan isin lolon to'o mate selu nola ita. Hodi nunia, Nia dadi sera nuhar morin mak nalo Na'i Maromak neon di'ak.✡
5:2: Ema Isra'el Sai Nosi Mesir 29:18, Kananuk Sia 40:6
3 Ita ne'e, Na'i Maromak eman mak moris moos. Ita keta moris sasobo. Hanoin lia sasobo moos, keta kedas! Keta halo lia kfo'er. Keta rotus teen.
4 Keta dale kadoor. Keta hakdadiuk mak la fatan baa Na'i Maromak eman. Di'ak liu, ita dale lia loos hodi sera dodan baa Na'i Maromak.
5 Hanoin di'a-di'ak! Na'i Maromak la simu ema mak moris sasobo, no mak nalo lia kfo'er. Nia moos la simu ema rotus teen, tan sia dudu sees Na'i Maromak nodi foti nasa'e lia seluk sia. Ema oin nunia sia, la bele dadi Kristus eman no la bele dadi Na'i Maromak renun.
Kristus eman musti moris iha kroman
6 Keta kona be'ur hosi ema mak dale bosok na'ak, “Lalika moris moos!” Na'i Maromak nanis nahibu ema mak la moris tuir Niakaan beer nunia.
7 Keta hadulur ho ema oin nunia sia.
8 Uluk, emi moris iha makukun tan la hatene Maromak. Mais oras ne'e, Nia naroma emikaan neon ti'an, nalo emi dadi baa Niakaan oan mak moris iha kroman.
9 Ema mak moris iha kroman, siakaan hahalok nune'e: Sia nalo lia di'ak, sia moris loos, sia dale moon,
10 no sia naka'as aan atu natene Na'i Maromak hakaran.
11 Tan lia nia, ita keta hadulur ho ema mak moris iha makukun, tan siakaan hahalok la nasai lia di'ak. Di'ak liu, de'an hodi dale loke fore siakaan salan mak sia subar,
12 tan siakaan hahalok kadoor liu resik, to'o nalo ita moe.
13 Ha'u kfoo knaninuk nune'e: baho'ak mak ema subar iha makukun, kalo kona kroman, nanis ema bele naree malorek baho'ak nia sia.
14 Nunia moos, lia aat mak ema subar. Kalo kona kroman, nanis ema bele natene na'ak, hahalok nia, hahalok aat. Noo kananuk ida na'ak,
“Hei! Emi mak toba, hadeer ona!
Emi mak mate, moris hikar ona!
Tan Kristus beer atu naroma emi.”
Kristus eman musti moris neon mesak ho Kmalar Lulik
15 Tan lia nia, ita musti leno di'a-di'ak itakaan moris, nebee keta moris hanesan ema momok. Di'ak liu ita moris hanesan ema matenek lia Maromak.
16 Oras ne'e, ema wa'in nalo lia aat ti'an. Dadi, kalo noo leet halo lia di'ak, halo baa ona. Keta hein tenik!✡
5:16: Kolose 4:5
17 Keta momok, mais harui aan atu hatene itakaan Na'in hakaran.
18 Ita keta lanu aat, to'o hemun nia babilan falik ita. Mais ita musti loke neon, nebee Kmalar Lulik mak babilan ita.
19 Ita musti hakbiit malu neon hodi lia fuan nosi Hakerek Moon, hodi kananuk mak tonu-naboot Na'i Maromak, no hodi kananuk seluk sia mak ita simu hosi Kmalar Lulik. Kalo hananu tonu Na'i Maromak, keta iha ibun dei, mais hodi neon no laran.
20 Ama Maromak nalo lia wa'in ti'an bodik ita. Tan lia nia, ita keta hanawa sera dodan baa Nia hodi itakaan Na'in, Yesus Kristus naran.✡
5:19-20: Kolose 3:16-17
Kristus eman hotu-hotu musti hanono malu
21 Ita hotu-hotu musti hanono malu. Hodi nunia, ita hatudu kneter baa Yesus Kristus.
Knaninuk feen-la'en
22 Feto mak noo la'en sia! Emi musti hanono baa emikaan la'en, hanesan hanono baa itakaan Na'in, Yesus Kristus.
23 Tan la'en nu'u ulun bodik feen, hanesan Kristus dadi Na'in bodik Niakaan ema sia, tan Nia mak sori sia.✡
5:22: Kolose 3:18, 1 Petrus 3:1
24 Kristus eman musti nanono baa Nia. Nunia moos, feen musti nanono baa la'en iha lia hotu-hotu.
25 Mane mak noo feen sia! Emi musti hadomi emikaan feen, hanesan Kristus nadomi Niakaan ema nodi latan isin lolon, to'o mate selu nola sia.✡
5:25: Kolose 3:19, 1 Petrus 3:7
26 Nia nalo nunia, nebee ita dadi moos iha Na'i Maromak oin. Kristus namoos ita nosi itakaan salan, nodi Niakaan Manfatin no wee sarani.
27 Ita mak Kristus eman, hanesan sasudin feto mak nafutar aan furak, tan sasudin mane atu mai saka. Nunia moos, Kristus atu mai saka ita. Dadi, ita musti moris furak no moos.
28 Nunia moos, mane mak noo feen. Emi musti hadomi emikaan feen, hanesan hadomi isin lolon du'uk. Tan kalo la'en nadomi feen, ne'e na'ak, nia nadomi isin lolon du'uk.
29 La noo ema ida mak hirus isin lolon du'uk. Mais nia babilan di'a-di'ak, hanesan Kristus babilan di'a-di'ak ita,
30 tan ita ne'e, nu'u Niakaan isin lolon.
31 Hakerek Moon na'ak, “Tan lia nia, mane musti la'o nela inan no aman, nebee moris neon ida no feen, tan sia rua dadi mesak ti'an.”✡
5:31: Lia Uluk Fohon 2:24
32 Hori uluk ita hatene ha'ak, Maromak Manfatin nia natudu lia dadomin feen-la'en. Mais oras ne'e, ita hatene ha'ak, Manfatin nia moos natudu lia Kristus dadomin baa Niakaan ema sia.
33 Dadi, mane mak noo feen musti nadomi feen, hanesan nadomi isin lolon du'uk. Feto mak noo la'en musti nakneter la'en.