1 Ema nanawa tokar lauk iha kota Efesus ti'an, Paulus libur nola Yesus eman sia, hotu nakbiit siakaan neon. Hotu nia tami, baa nikar rai Makedonia. 2 To'o baa, nia moos la'o nasirin leo nodi nakbiit Yesus eman sia neon iha rai nia. Hotu nia tama rai Yunani. 3 Nia nein iha rai nia fulan tolu laran. Hotu nia nadi'a aan atu sa'e roo tasi fila baa rai Siria. Mais tan nia rona nola na'ak ema Yahudi ko'a kabuar lia atu no'o nia, nia la sa'e roo ona. Nia la'o rai tuir Makedonia.

4 Ema na'in hira moos tuir Paulus. Sia mak ama Pirus oan Sopater nosi kota Berea, no ema na'in rua naran Aristarkus no Sekundus nosi kota Tesalonika, no ema na'in ida naran Gayus nosi kota Derbe, no na'in tolu tenik naran Timotius, Tikikus no Trofimus nosi rai Asia.

5-6 Ema nia sia la'o uluk Paulus baa nein ami iha kota Troas iha tasi balu. Baa oras nia moos, ha'u Lukas (ema mak nalo hakerek ne'e) kasoru kikar Paulus iha rai Makedonia. Oras ema Yahudi loron boot Paska liu ti'an,* 20:5-6: Hakerek Moon lia Yunani na'ak, ‘loron boot sia bodik Dahur Tubi Bakae’. Baa loron boot nia sia, ema Yahudi nadi'a Dahur Paska. ami rua sa'e roo tasi baa kota Troas. Ami la'o loron lima laran, foin to'o kota Troas. Hotu ami tuun, hasoru hikar amikaan mamaluk sia iha kota nia. Ami moos hein ho sia domiku ida.

7 Baa loron domiku nia, Paulus katak na'ak, “Mamaluk sia! Awan ha'u atu kla'o liu.” Tan Paulus atu la'o nunia, ami Yesus eman sia libur malu atu haa hamutuk. Paulus moos nanorin ami to'o kalan boot. 8 Baa kalan nia, ami libur malu iha uma ida tetu leten. Ema sunu badut wa'in iha nia. 9 Noo mane nurak ida iha nia, naran Yutikus. Nia tuur nosi kuak anin iha ke'an tetu nia, nodi rona Paulus. La kleur, matan nakati to'o dukur. Teki-tekis, nia monu baa rai, mate kedas. 10 Paulus tuun, baa nako'ak nola mane nia, nodi dale na'ak, “Lalika hata'uk! Nia la mate!” 11-12 Rona nola nunia, ami hotu-hotu neon di'ak, tan mane nia no'i moris. Hotu ema nodi nia fila nikar baa uman. Ami hotu-hotu moos sa'e hikar baa tetu leten, hotu Paulus fa'e tubi, ami haa hamutuk. Paulus natutan dalen to'o rai nakroma foin ami la'o.

13 Nunia hotu, ami ko'a kabuar lia atu fa'e malu to'o hasoru hikar iha kota ida naran Asos. Ami sa'e roo tasi baa Asos, mais Paulus la'o rai dei.

14 Hasoru malu ti'an iha Asos, Paulus moos sa'e baa roo. Hotu ami liu baa kota Metilene. 15 Hosi Metilene, ami liu tenik. Baa awan, ami kre'is rai ida naran Kios. Baa wainrua, ami se'i oin baa rai Samos. Baa waintolu, ami to'o kota Miletus. 16 Baa oras nia Paulus la no'uk tuli kota Efesus, tan nia beer to'o lai-lais Yerusalem atu tuir loron boot Pentakosta iha nebaa.

17 Tan Paulus la noo leet atu baa Efesus, nia solok lia baa fukun sarani Efesus sia, nebee mai nasoru nia iha Miletus. 18 Sia to'o Miletus ti'an, Paulus katak baa sia na'ak, “Mamaluk sia! Emi hatene ha'ukaan moris nahuu nosi ha'u kfoin sama ain iha rai Asia ne'e to'o baa oras ne'e. 19 Emi moos hatene ha'u kserwisu bodik Na'i Maromak iha emikaan klaran. Ha'u la dala ida kfoti aan. Ha'ukaan luun turu wa'in. Ha'u moos ketan susar wa'in, kosi ema Yahudi siakaan a'aat. 20 Masik nunia moos, ha'u kanorin emi lia hotu-hotu mak ha'u katene. Ha'u kanorin emi iha ema lear oin no iha emi ida-idak uman. 21 Ha'u kanorin emi mak ema Yahudi no emi lahoos Yahudi ka'ak, emi musti soe lakon emikaan salan, nebee tuir Na'i Maromak. Emi moos musti fiar baa itakaan Na'in, mak Yesus.

22 Oras ne'e, ha'u atu katak baa emi nune'e: Ha'u atu kbaa Yerusalem, tan Maromak Kmalar Lulik mak dada ha'u. Masik la katene saa mak atu dadi baa ha'u iha nebaa moos, ha'u ktuir dei. 23 Oras ha'u kla'o kosi kota ida baa kota ida, Kmalar Lulik katak kedan baa ha'u iha fatin hotu-hotu na'ak, ha'u atu ktama bui kodi katiu susar wa'in iha Yerusalem. 24 Mais so'in, tan Na'i Yesus mak latan serwisu ne'e baa ha'u. Ha'u kmusti baa katak Lia Di'ak baa ema, nebee sia moos natene Na'i Maromak laran di'ak. Kalo la ktuir Niakaan hakara kodi kala'ok Niakaan serwisu ne'e to'o mohu, ha'ukaan moris la noo folin.✡ 20:24: 2 Timotius 4:7

25 Kleur ti'an ha'u kanorin emi nosi lia Yesus to'o emi dadi baa Na'i Maromak eman. Oras ne'e ha'u katene, emi atu la haree ha'u ona. 26-28 Tan lia nia, rona di'a-di'ak! Ha'u kamohu ti'an ha'ukaan serwisu iha emikaan klaran. Oras ne'e, emi musti serwisu du'uk ona. Kalo ema la tama dadi Na'i Maromak eman, emi na'in mak hataa hola. Lahoos ha'u! Hanoin di'a-di'ak! Ha'u kalore ti'an Na'i Maromak hakaran hotu-hotu baa emi. La noo lia ida mak ha'u ksubar baa emi. Emi musti daka aan di'a-di'ak, nebee emi bele haliku di'a-di'ak ema hotu-hotu mak Na'i Maromak Kmalar Lulik latan baa emi. Nia boi emi, nebee emi haliku Niakaan ema sia hanesan makbalin naliku bibi malae sia. Keta halu'a katak baa sia ha'ak, Yesus mate atu selu kotu sia nodi Niakaan raan du'uk.

29 Mais sintidu! Kalo ha'u kla'o kela emi ti'an, ema seluk atu mai nanorin tolek emi nodi koko emikaan fiar, hanesan asu fuik mak tama baa lalutuk tata no'o bibi malae. 30 Ema mak nanorin tolek nunia, balu nosi ema seluk, balu nosi emi du'uk. Sia atu dada kokon ema nebee keta tuir Yesus ona. 31 Tan lia nia, emi musti daka aan di'a-di'ak. Keta halu'a, ha'u kein kamutuk ko emi tinan tolu laran. Ha'u la koran kole tate'an emi loron-kalan. Ha'ukaan luun moos turu wa'in ti'an, tan emi.

32 Oras ne'e, ita atu fa'e malu ona. Ha'u klatan emi baa Na'i Maromak liman, kodi kakro'an nebee Nia natudu laran di'ak baa emi. Nebee emi hatene Niakaan Manfatin, tan Manfatin nia noo beran atu nakbiit emi. Manfatin nia moos loke dalan nebee emi bele simu fafa'ek mak Na'i Maromak nadi'a kedan bodik Niakaan ema moon sia.

33 Baa oras ha'u kserwisu iha emikaan klaran, ha'u la kakara kola emikaan naha sa-saa. Ha'u la kusu kedan emikaan naha mean, lale mutin, lale tais, lale saa dei. 34 Oras nia ha'u kserwisu du'uk buka moris bodik ha'u ko ha'ukaan mamaluk serwisu sia. 35 Kodi lia ne'e, ha'u katudu dalan baa emi, nebee emi moos haninu baa ha'u hodi tulun ema susar sia. Hanoin di'a-di'ak, tan Na'i Yesus dale na'ak, ‘Lia di'ak kaliuk mak ita foo nosi ita simu.’”

36 Dale notu nunia, Paulus no fukun sarani Efesus sia nakni'a bele-bele, hotu Paulus namulak nodi nakro'an nebee Na'i Maromak naliku sia. 37-38 Sia hotu-hotu neon susar, tan Paulus dale na'ak sia atu la nasoru nia ona. Oras sia fa'e malu, sia nako'ak Paulus, de'i nodi tanis. Hotu sia nala'o ami† 20:37-38: ‘Ami’ iha ne'e, Lukas mak nakerek hakerek ne'e. Lukas la'o namutuk no Paulus no siakaan mamaluk seluk sia. baa roo.