Puka Pianullu di nakot nohora Uplerlawna Na'ohi-na'ara nohkerna-rai miaran di nora darta-lyanti, lera-wolla la'pa ihini-mniotni honona. Nakot nohor walia do'a-hala mak kala' ulu, pede rimormiori rler la lui-nuhru, kropna-krieutu la'pa matmiati-molmuolu. Puk di nakot nohor walia emkameni la Uplerlawna Nora rimormiori idma nla'a-nmai ida.
Puka Pianullu di de nhiakarni woru:
1. Onni (Pasal) 1-11: Nhiakra ida de nakot nohora Uplerlawna Na'ohi-na'ara noheri woru-lyanti nayanni. Nakot nohor walia Adama nora Hawa'a, Kain nora Habel, Nuh nor romni mniotni la gera ktiowru-opli nhia'a de, la'pa riy rariria rom tutul liawna la'a Babel.
2. Onni 12-20: Nhiakra woru de nakot nohora makden Israel re upni-tgarni. Israel re upni-tgarni mak kala' ulu de Abraham. Abraham nla' riy maka ha rwetwet la nanni onnila pesiayni mak karuri-ka'orat meman la Uplerlawna, pede nlernohor reria Uplerlawna lirni. Abraham na'a'na nana Isaka, Isak na'a'na nana Yakopa nora Esau (Yakopa de rwet walia la Israel). Israel na'a'na nana muanke'a riy termida wehrani woru mak kla' upa-tgara la Israel luwnu-a'nani termida wehrani woru re. Puk di nakot nohor walia Yakopa a'nani Yusup. Onnila Yusup di pede Yakopa nora upni-a'nani honona ralewna la ler maka rler la lehka-lara, la'pa ir honona rwatitin pa rla'awa Mesir.
La' Puk di ralamni de itamkeka de Uplerlawna Na'ohi-na'ara noheri woru-lyanti nayanni. Ne E' ed maka ktera-kdema hare honona. E' ed maka kukmua riy mak khi' do'a-hala me Nara'a-napalu riy mak kpesiay E'a. E' edon Nolin limni la'a riy mak kpesiay E'a mere Ntutga talan la ir mormiorni.
La' Puka di de e rakot nohor emkadille:
1. Uplerlawna Na'ohi-na'ara nohkerna-rai miaran di nora ihini-mniotni
(1:1-2:25)2. Do'a-hala mak kala' ulu nareiniande lui-nuhru, kropna-krieutu nmai lia nohkeran di
(3:1-24)3. La' Adam lerni la'pa ntutu-nte'ela Nuh lerni
(4:1-5:32)6. La' Sem lerni la'pa ntutu-nte'ela Abram lerni
(11:10-32)