501Noka Yusup nlawra inonni la amni gaini wawannu, na'nama nkakru me nkinnia. 2Ne Yusup nhopna hopopanni-lili'irnu mak khi'a koda-atiawi re, totpa rala koda-atiawi rtomna amni inonni. Noma rlernohora Yusup lirni. 3Ir ralla koda-atiawi, pa rtomna inonni na'an lera terampwogata, rlernohora hya' maka nhi'inde makden Mesir rhi'a, ne makden Mesir rkakur nohora Yakopa mahnekni lera terampwo'itu.

4La'pa lardoinia lera lului-nurnuhru re, dewade Yusup nakot la Firauna nhiutni-nhianni-nhielli-liarni: "Ama-hyal miy re, la'pa aliernana ralam kalwiedmi de mikot la Firaun, 5de a'mu nhopna aliokar la, niwra: "Edon nalo'on de amuat wia, la'a ho'yu-kietru maka a'uwte'ta oleka la Kana'an de, midera a lia' hande. Hade pede miolli a lia pa lia'awa hande totpa a'udera a'mu la lien de, nhor diemade a'uwali owa'ana."

6Noka Firauna nakot la: "Mlia'awa hande pa midera ammu la liena, emeka ha nhopna omliokar la."

7Noka Yusup nala' pa nla'awa hande totpa nadera amni, ne nor rewre'wa Firauna tniutnu-nhianni-nhielli-liarni re honona wali, ina-ama mak kdella istanni ralamni, ne ulu-o'ta no'a Mesir re honona re, 8na'itra Yusup romni mniotni, hyalli rena me amni romni mniotni, eneknek to'a a'nani me nhiurni-wnia'anni re, raltarga rla Gosyen lowanni. 9La'pa kereta me mak kha' kuda, de de makodi keki-rautu, ror wal pia rla'awa hande, nhi'nande mutnu-taurnu re plahwani.

10La'pa rte'ela Goren Ha'atad, la'a gerlawna Yordan walli, noma rhi'a yapolu-yatniani matmiati id la hande, ne Yusup nalul niana lera wo'itu lia amni de. 11La'pa let de mniotni, makdena Kana'ana ramkeka yaluli-yahon la Goren Ha'atad de, dewade riwra: "Hadi de makdena Mesir yalulli-yahonni maka kokokna-rariarin matmiati." Hade pede rweta gen mak kdella Yordan walli de, Abel Misraim (nnia'eratni de, makden Mesir yalulli-yahonni).

12Emkade pa Yakopa a'nani re rhi'a emeka amni nano' targa la ira. 13A'nani re rrana pa rodia rla'awa Kana'ana lowanni ne rkenia la hu'ula-liena ralamni la'a Makpela, nhyi'ini maka Abrahama nawel nian oleka la Efrona makdena Heta de, pa rhi'a la hoi-kietra wamueheni, de nhyi' mak kdella Mamre walli tipru. 14La'pa rkenia amni pa nhorwua dewade Yusup nawal lia Mesir wa, nora amni-hyalli rena me riy honona mak kor rewre'wa rla' hande pa rla rkenia amni la liena ralamni.

15La'pa Yusup hyalli re rat niohora oleka de amni nmati olekwa dewade riwra: "Yanhi'pa Yusup naun targ ita! Pa nwahla ita nhiol yatni la e'a." 16-17Hade pede rhopan pa rla rwe'era nnio' dilla Yusup: "La'pa it amni edonna nmat mia'ta de nano'targ oleka: "Emkadilla la'pa mikota la Yusup: Mhuoratdoini hyalmu re do'oni-halli, yoma rhi' oleka nhiol yata-liet yat la o'a. Noma dodo'ondi de, mhuoratdoini mak khima-kre'a ammu Uplerlawanni re do'oni-halli."" Yusup natlin nana hare lirni, de: "Mhuoratdoini hyalmu re do'oni-halli", de nkakur wa, (yoma hyalli re raplin ma'ta de nhoratdoin oleka ir do'oni-halli).

18La'pa hyalli re rmeh'a rmai pia rwaltiora-rwaltieman la riwra: "Ammai pia mla' atmu-wa'armu."

19Mere Yusup nakot la re: "Yan mimta'ata. Uplerlawna edon a'u. 20Plollolli de miy e mpiarora-mpialaiya yotyotni-yatyatni mai a'u mere Uplerlawna Nwarora-nwalai niana kalwiedni-paitiotni, totpa Nhi' nana hya' maka Nhi'a la ler di, de Nalewna riy harahu mormiorni-dardiarni. 21Pede yan mimta'ata, hota agala yaya'anmi me a'nami re yaya'anni re." Emkadella pa naltier samomuou la ira totpa nhi' ralamni re pa rahepru, totpa yana ralamni re worworga owa'ana.

22Ne Yusup de nden nek la Mesir pa na'itar wutu luwnu-a'nani, ne Yusup nmormior niana anni rahu ida termida. 23Pede Yusup nre'ela namkek nohora Efraima upni-a'nani la'pa ndait nana tuwu wotellu, me la' walia Yusup nakerna-nagatna Manasye upni (Makhir a'nani) la riwni wawannu.

24Yusup nakot la hyalli re niwra: "Edon nalo'on ma'ta de amuat wia, plollolli de hota Uplerlawna Nlinreri-nmatrermi me Nod miy pia mhiargot la'a gen di pa mlia'a la gen miaka Nano'targa de Nnairi liokra la Abrahama me Isaka me Yakopa." 25Yusup nakot la hyalli re honona niwra: "Plollolli de hota Uplerlawna Nlin reri-nmat rer miy pa mlia'awa Kana'ana. Hade pede dodo'ondi mliokar pa la' ler de de, miodgiota a ru'ru-kliaklu mak kdella handi pa mlia'awa."

26Nhorwua dewade Yusup nmat wia, de mormiorni anni rahu ida termida. Rala koda-atiawi la inonni, ne rkenia la lumni la'a Mesir.