ISIN DENG KIT IN PARSAI
man kil didi ne Lamtua Yesus atulin in nutus sas
Tasoa le “ Isin deng Kit in Parsai ka” muki lia?
Hmunan nu atuil in haup sarani ngas hao noan, “Auk parsai se Yesus Kristus, na Ama Lamtua Allah Ana ka.” Oen hao ela kon no, muik dasi bili-ngala puit deng kit atuil Kristen ni in parsai ka. Tiata nataka le, deng taun 140M, tulu deng grija las tian isin deng kit in parsai ka, le halin totoang atuil Kristen ni taan haup in parsai man toma ka. Un isin nas totoang, oen katan deng Ama Lamtua in Dula Niu ka. Nini ela, atuli li taan nal in tui man tom lo ngas kon. Nenesang kon grija la tapnaeng dasi mesa-dua. Lius abad itu la halas-sam, “Isin deng Kit in Parsai ka” daid banansila el kit in pake se hahalas nia ka. Lolo hmunan nu maa lius halas nia, atuil Kristen deng grija ola-ol tuun, leo-leo pake in teka-teka nias le tek nuting apan, deng kit atuil Kristen ni in parsai ka. [1]
Kit parsai se asii la? Nol asa man kit parsain na?
1 Auk parsai se Ama Lamtua Allah,
2 na Ama Lamtua man koaas dudui ka,
3 man koet apan-dapa ku nol apan-kloma kia.
4 Auk parsai se Yesus Kristus,
5 na Ama Lamtua Allah Ana Baun siing nga.
6 Un na mo kit Lamtuan.
7 Un ina Maria behen nini Ama Lamtua Koo Niu ka,
8 molota un niin net nol bikloeb lo bii.
9 Gubernur Pontius Pilatus man prenta le diku-puang Yesus.
10 Oen pauk holtiu Una, se kai sangsuli la dapa.
11 Un mate hidim oen puan Una.
12 Un niu lako atuil in mate ngas mana la.
13 Bingin dua ka, Kristus nuli pait deng Un in mate ka. [2]
14 Un sake lako surga,
15 hidim daad se Ama Lamtua Allah halin kanan na, se maan in todan-lahing dudui ka.
16 Maam Un niu pait maa deng ua,
17 le nutus in hukung bel atuil in nuli nol atuil in mate ngas.
18 Auk parsai se Ama Lamtua Koo Niu ka;
19 Auk parsai noan, Ama Lamtua grija niu ka muik ne ola-ola;
20 Auk parsai noan, atuil Kristen ni musti nuil dalen mesa, nol dael niu;
21 Auk parsai noan, Ama Lamtua kose soleng kit in kula-sala ngas;
22 Auk parsai, le eta Ama Lamtua bel kit nuling pait tam, kit nuling nol aap-sisin balu;
23 Auk parsai kon noan, Ama Lamtua bel kit in nuil toma man hidi nutus taan lo ka.
Auk in parsai ka ela son na.
Baktetebes ela!
[1]In teka-teka se “Isin deng Kit in Parsai ka” katang lo deng asa man kit in les ne surat Roma 15:13, 2Korintus 15:3-7, Filipi 2:5-11, 1Timutius 6:13-14, 2Timutius 2:8, 4:1. Paulus nol un tapan nas kon dul deng “kit in parsai ka” ne Roma 6:17, nol 1Timutius 6:12. Petrus lok kit kon le tek atuli li deng kit in parsai ka, dulan ne 1Petrus 3:15.
[2]13: Se dais Yunanin nam oen mulai kaih deng: leol neot nia (= 1), ola kam (= 2), bingin dua kam (= 3), bingin tilu kam (= 4). Tiata se dais Yunanin nam, τῃ τρίτῃ ἡμέρᾳ "leol tilu" mo se dais Helong ngam, leol na nahi tom se "bingin dua ka". Nangan ne, ta Lamtua Yesus mate se leol lima ka (kahin mesa). Ola ka, leol eneng (kahin dua), na Lamtua Yesus se bolo dalen nabale. Bingin dua ka, leol minggu (kahin tilu), na Lamtua Yesus in nuli pait ta. Tiata eta muid kit in kaih lelon nia lam, Un mate duman dua, halas-sam Un nuli pait. In teka-teka dais Yunanin ἀναστάντα ἀπὸ τῶν νεκρῶν ki, nahin na se dais Helong ngam, “nuli pait deng Un in mate ka”, molam “sake pait deng atuil in mate ngas hlala” lo.