Titus nia mo atuil Yahudi lo, mo un tama dai atuil Kristen son. Un kon muid paulus lako se ola-ola didiin un daid Paulus atulin in parsai. Nesa-nesang kon Paulus nutus una le lako daek osa bili-ngala nini ela lam titus kon daid Lamtua Yesus atulin in dake (Galatia 2:1-3; 2 Kor 2:12-13; 7:5-16; 8:6; 16-17, 23; 12:18; 2 Timutius 4:10)
Asii man dul surat Dulan se ola ka? Nol dulan blingan na?
Surat Titus sa esa tek noan Paulus esa man dul surat nia (1:1). Muding atuil in tana ngas sam nataka le Paulus dul surat Titus si se taun 63-66M. Muik deeh nangan noan Artemas tam le Tikikus man kil surat ni bel Titus se nusa Kreta (3:11). Mo muik atuli dehe man nangan noan, Paulus dul surat Titus si se kota Makedonia mo kit taan na nol baktetebes lo. Tinang mana-mana las ne buk ni/Alkitab pi klupu ka.
Tasao le Paulus dul surat ni lia?
Paulus nang Titus dada se kota Kreta le halin Titus doha-tinang atuil in parsai se kota na ngas(1:5). Nusa Kreta la na mo nusa tene. Se na muik atuil Yahudi mamo buit. Teng deng one la taom kom in labang daat (1:10). Atuil Kreta las aa bali apan nas noan, oen nas mo nole-lilung daat. Oen aa kam pretet-hahaing tukun mo oen dake lam dai-late tukun nol os daat ta peke ka na 1:12)
Buk na tulu ki deng asa la?
Paulus tui-tek Titus deng dasi aat
- Mesa laTulu in kil jemaat tas eon musdti kaing atuil in tui kula ngas le tenen deng oen in tui kula na.
- Dua la Tui tek bel atuil in parsai bua? la lo, nas biklobe blalan nol bihaat blalan. Tiu bikloeb muda kas deng oen in tao elola ka, mo bihat blalan nas kon musti tui tikang bihat muda kas nol ata kas in nuli musti tao elola ka kon (2:1-15)
- Tilu la Tuil tek deng atuil in parsai ngas lalan in nuli ka. Oen boel sudung apa deken, mo oen musti nuil kumis mina nol daem apa, undeng Kristus tulu Un dalen in banan na bel mian son, nol Un bel boablingin mi son. Oen kon nini lalan elol le musti man-koet atuil in tao jemaat tas sisake ngas sa (3:1-11)
- Aat ta Atuil in parsai ngas musti nuting lalan tutungusle nuil se in daek banan (1:8,16; 2:3,7,14; 3:1,8,14) Paulus tek nuting Titus, peke man tui deng Kristus nol atuil in parsai se una ngas (2:11-14; 3:4-7). Paulus kon dul bango man in tele deng Lamtua in bel kit boa-blingin noan: kit in nuli ki daat tuladang ela kon no Ama Lamtua Allah bel kit boabingin na tulu Un in namnau nol dalen in banan taung kita ka na.
Un bel kit boa-blingin undeng kit in nuil banan na lo, mo undeng un in namanu kita ka. Un boe baes soleng kit in kula-sala ngas nini Un Koo Niu ka le tao kit in nuli ki balu banansila el in hua ulang kita ka (3:4-5)
Buk ni in mudi-muid apa elola?
| 1. Paulus sai un surat ta | 1:1-4 |
| 2. Tulu in kil jemaat tas in nuli ka elola | 1:5-16 |
| 3. Tui-tikang bel atuli bualo. | 2:1-15 |
| 4. Atuil in parsai ki in nuli ka musti elola la | 3:1-11 |
| 5. Paulus tele un surat ta | 3:12-15 |