Korintus dua la

Asii man dulan na? Dulan se ola ka? Nol dulan blingan na?

Taun 50-52M, nataka le Paulus tutan-lau bulan 18 se kota Korintus (Dehet deng Aan in Nutus sas 18:1-7). Hidi nam deng taun 52-55M, un lako lii-lau se kota Efesus. Dedeng un se kota Efesus sa, un dul surat Korintus mesa la. Hidim Titus man kil nol surat na la lako bel jemaat in se kota Korintus sas.

Surat Korintus dua la man tek noan Paulus esa man dul surat nia (1:1) Timotius kon leo-leo nol una.

Muid atuil in tana ngas sam, Paulus dul surat Korintus dua la, nataka le se taun 55-57M la. Taan parsis lo, le un dulan se ola ka. Muik in nangan noan un dulan se propinsi Makedonia, se dedeng Titus halas-sam pait maa, le kil dehet deng atuil in parsai se Korintus sas (7:5-13). Mo oen in nangan na bakisan. Muik atuli deeh nangan noan, Titus man kil nol surat ni laok bel atuil Korintus sas. Tinang maan nias totoang se peta las ne buku la klupa ka.

Taon elol le Paulus dul surat ni lia?

Paulus dul surat ni se dedeng un nol atuil in parsai se kota Korintus sas in butu-kil apa ka banan lo.

Atuil in se kota Korintus sas, in parsai ka kon didi lo. Oen nulis ne mana mesa, atuil in nuil ne a ngas daat isi. Nol muik atuil in nole-lilung, man tui in tom lo ngas se jemaat ta dalen. Oen bilu-aa Paulus tutungus noan, un na mo Yesus atulin in nutus esa lo. Undeng na le, Paulus bela un apa ka. Mo Paulus kon tulu beles noan, un kom isi nol nuting lalan le sadi haup in babanan pait nol one. Un kon nodan mamo, undeng un in aa nol one ka muun isi, mo ela ko no muik in pesang le babanan pait nol una (peke 1-7).

Un kon nodan atuil in parsai se kota Korintus, le hulung atuil in parsai se kota Yerusalem, man tom susa ngas. Dedeng un tekas le hulung nga, un kon tui oen deng duit. Peke 8-9)

Se kota Korintus, muik atuli deeh aa nole-lilung le noan nikit apan nas daid Yesus atulin in nutus. Oen kon aa le noan tao nahu Paulus. Mo Paulus dasin in siut bali one ka nakan isi, ngat se (peke 10-13). Un kon aa in lebo le noan nikit apa ka banansila el one. Molota un suma le tulu bel tada noan, atuil in nole-lilung nas nangan taan baktetebes deng Yesus dalen in banan nol kit totoang nga lo.

Buk ni dul deng asa la?

Surat Korintus dua li le tao titu dasi-dais man in puit se jemaat ta ngas. Paulus tek atuil in parsai se kota Korintus sas nol langa-langa, deng un bon in iil nol one ka. Un kon mae lo nol in naka one, eta oen daek in toma ka (6:11-13 ; 7:2-16)

Paulus tui elia

Ama Lamtua Allah in hida balu ka, mo Yesus na (peke 3:1-18)
Kit nataka kam kit kuat-tes lo, nol hahalas ni kon kit haup susa-daat mamo, mo mam Ama Lamtua tao kit in daek taung Una ki le haup isin banan, nol Un kon le nikit sakeng kit lapa-lapa(4:1-15)
Etan kit nuling pait tam, kit aap-inan baluki hnika ka elola la? (4:16-5:10)
Tao banan pait in butu-kil apa man daat son na (5:11-21)
Atuil in tui-tikang man banan (6:1-7:16)
Atuil in parsai ngas musti hulung apa(8:1-9:15)

Paulus hep un surat ta nini in aa le bel hangun se one (13:13)

Buk ni lalan in dula ka elola la?

1. Paulus sai un surat ta	1:1-11
2. Paulus kil didi un in dake hmunan na, se dedeng un se Korintus sa	1:12-7:16
3. In hulung taung atuil in ngas se propinsi Yudea	8:1-9:15
4. Paulus kil didi un hak man daid Yesus atulin in nutus sa	10:1-13:10
5. Paulus hep un surat ta	13:11-13