Doh bahan babanan le halin aa dahu-dahut deken

31Kaka-pali me! Muik atuli mamo le tui atuil in parsai ngas. Na banan! Mo nangan, ta Ama Lamtua Allah pres atuil man tui atuil in parsai ngas muun dui pait. Tiata atuli li tui kam, tui dadahut deken. Tail laap in se ahlote la baha ka ka

2Kit totoang niam aa kula bili-ngala. Mo atuil man doh nal un baha ka le aa dadahut lo ka, un doh nal un in nuli ka totoang kon. 3Kat kleta deng ahlote. Kit pekot nal ahloet tene mes le muid kit in koma ka, suma nini in din un tail lapa la ka tuun. 4Kleta didang pait el lui ina. Angin tuan huu kuti-kuti lui ina tene mes muid un in koma ka. Mo kai bleha ulin ana mes tuun kon pekot nal lui ina tene na in lali ka, muid atuling ulin na in koma. 5Ela kon nol kit bahan nia. Kit bahan ni niam ana tuun. Mo un in dake-mana ka tene isi!*

Na banansila el ai opon ana mes kaa nuli alas tene mesa. 6Kit bahan ni banansila el ai opon na. Nini kit bahan nia lam kit tao didaan dasi mamo. Kit bahan ni tao dudus nal kit in nuli ki totoang. Dais daat mamo in ne apan-kloma ki ngias niam, puti deng atuli li bahan. Nol uikjale kas laih tuan na kon, pake atuli li bahan le lako-daek un osa la.

7Atuli li tao hmoa' net hmukit huin bili-ngala son, el hmukit in lolo, tilu-kee, nol ikan in ne tasi kua ngas. 8Mo muik tahan atuli mes lo bii kon, man tao hmoa nal un baha ka. Ta bahan ni niam mo, ana tuun molam ator ram susa. Un banansila el lasong man in lail papmes atuli li aap-ina ki didiin tao tele nal atuli lia.

9-10Taom atuli li nini un baha ka le naka-nahalit Ama Lamtua Allah. Mo hidi nam un nini baha kon, le lote-pisun atuli, man Ama Lamtua koet son muding Un sila-paen na. Na tom lo!aDehet deng Apan-kloma ki in Dadi ka 1:26

11Tuladang el, ui mata mesa lam hobon puting ui masin nol ui milu leo-leo lo. 12In naleta mes pait: taon elola kon malus ina puting isin saah lo? Nol taon elola kon ngae li puting isin anggor lo, ta lo? Ta kai li niam isin muding un hnika-tuladang nga.† Ela kon, kit bisa naus ui masin deng bolo ui milu lo.

In nangan tana man deng Ama Lamtua

13Atuil in nuting taan lalan, nol nangan taan dais banan mamo muid Ama Lamtua in koma ka, boel nikit-nikit apa ka deken. Ta un in tana ka maa deng Ama Lamtua. Nang le un tulu un in tana ka, nini lalan in nuil lolo tuun. 14-15Boel bahan tuan deken noan, ku niam atuil man in nangan taan dais banan mamo, eta ku idus le taan in tao nahu atuil didang si-sii. Ta na nahin na noan, ku nole-lilung son. In nuil ela ka, un ngala ka noan ‘nuting taan lalan, nol nangan taan dais banan mamo’ lo son. Oen-lalin in idus daat, tam kom in tao nahu atuil didang nga, niu maa deng Ama Lamtua Allah lo. Na apan-kloma ki in nuil-nola. Ni tom atuil man in nuli ka sao bel Ama Lamtua lo ngas. In nuil ela ka, muid uikjale kas lalan na na. 16Ta eta muik dael in idus, nol taan in tao nahu atuil didang ngam, taon elola ko muik lobo-lau nol atuli kon daek dadaat bili-ngala.

17Mo nangan tana man in niu maa deng Ama Lamtua ka elia: laih hmunan na un tao kit le nuil niu. Hidim un tao kit le halin komali hlapat lo, keeh tutungus, nol sium atuil didang in nangan. Un isin na kon tao kit le dalen babanan tukun, kom in tulung atuil didang, ngele halin lo, hidim sila-klup nol atuil didang lo. 18Nol atuil man tulu bel lalan in mole-dame ka, mam haup in banan na. Na banansila el atuli soko-hai bini mesa, le mam un haup pait isin banan.

*3:5: Dais Yunanin in se nia ki, pake dais, ‘meen’. Mo se dais Helong ngam, aa deng atuli li in aa kam, pake ‘meen’ lo, molam pake ‘bahan’. Banansila el baha tuan, baha potos, baha ka aa manu pen lo, baha laok baha, mee-baha, nol teng pait.

†3:12: Dais Yunanin dul noan, atuli li bisa nui συκῆ sukei (aebloa) deng kai ἐλαία elaia (saitun) ina lo, nol bisa nui ἄμπελος ampelos (anggor) isin deng συκῆ sukei (aebloa) ina lo. Un nahin na noan, kai ina mesa lam bisa puting isin deng kai ina didang lo. Ta na tom lo! Na banansila el atuli mes bisa pake un baha ka le naka-halit Ama Lamtua, mo hidi kam pake un baha ka le lote-pisun atuil lo.

a3:9: Dehet deng Apan-kloma ki in Dadi ka 1:26

Alkitab bahasa Helong juga tersedia dalam versi HP