201Nikit atuli las tao lobo-lau lo tukun nam, kota Efesus ete pait banansila el lelo-leol in hidi son nuas. Kon nam Paulus haman nakbua atuil in parsai se kota na ngas, le tao teken oen dalen nas. Hidi nam, un seon le boka lako propinsi Makedonia. 2Lius se lua kon, un laok pukiu ingu-iung in se la ngas, le tao teken atuil in parsai ngas dalen nas. Un tao ela didiin un tama lako atuil Yunani las mana. 3Un daad se la bulan tilu. Hidim un mana-mana le noan saek lui ina le lako propinsi Siria kam, un ming haup noan, atuil Yahudi las koo mes son le keo tele una. Ming ela kon, un luan laa le napiut lako propinsi Siria lo, mo un pait lako deng propinsi Makedonia tuun.

4Muik atuli buan ana mes kom le muid Paulus. Atuil nas, Timutius; ama Pirus ana Sopater, man deng kota Berea; Aristarkus nol Sekundus deng kota Tesalonika; Gayus deng kota Derbe; nol Tikikus duas Trofimus deng propinsi Asia.

5-6Kon nam, au (Lukas man dul surat nia), tutnaal Paulus pait se kota Filipi, ne propinsi Makedonia. Hidi na kon, Paulus ima-ii las bok lakos muna, le natang kaim duam se kota Troas, ne tasi suut halin nua. Nikit atuil Yahudi las lelo-leol tene Paska*In dula dais Yunanin na dul noan, ‘lelo-leol banan deng Ruti in Pake Bibit lo’ ka, nahin na noan ‘lelo-leol tene in mana taung Paska’. la mana le hidi kon, kaim duam saek lui ina, le lakom kota Troas. Dedeng na, kaim lail se tasi dapang lelo lima. Kaim lakom lius se kota Troas kon, kaim nium deng lui la. Hidim kaim tutnaal nol kaim tapan tenga las pait. Kon nam kaim daad se lang minggu mesa.

7Neot mesan na, tom nol leol Minggu†In noken noan leol ‘Minggu’ ka halas-sam puti mo bango nia. Atuil in tana dehe tek noan, se dedeng na atuil Yahudi las taom nakbua le kaa ruti se leol mesa deng leol Sabat ta. Undeng se leol na, Lamtua Yesus nuli pait deng Un in mate ka. Tiata nesa-nesang kon nam oen tao leol na, daid leol in nakbua le kohe-kanas. . Paulus tek kaim noan, “Kaka-pali me, auk nutus son le ola kam auk lakong napiut.” Tiata kaim atuil in parsai ngas totoang, nakbua le halin kaa-ninu leo-leo. Undeng Paulus le lako, tiata un nahdeh nol kaim didiin bingin-tai. 8Kaim nakbua se uma mes hnoden tilu la dapa. Duman na, oen hoet hadut mamo kose. 9Ta muik tana-biklobeng muda mesa, ngala Yutikus, daad se jendela la. Un kon muid le hii deng Paulus in dehet ta. Mo nesa-nesang kon, un mata tede ta un niin nala. Nahkitu lam, un nahi deng jendela la, ti mate meman. 10Kon nam Paulus niu lako, le neok tana-biklobeng na. Hidim un tek kaim noan, “Lii deken, ta un nuli.” 11-12Kaim totoang dalen kolo, undeng tana-biklobeng na nuli pait baktebes. Hidi nam oen nolan pait lako un uma lua. Mo kaim saek pait lakom hnoden tilu lu dapang, le daad kaa leo-leo se lang. Kon nam Paulus tupang un dehet ta didiin ohkaong. Nikit lelo la sake kon, un seon kaim le boka lako.

13Hidi nam, kaim aa nol apa le laok bakisan lalan, mo mam tutnaal apa pait se kota mesa, ngala Asos. Tiata kaim saek lui ina le lail lakom kota Asos. Mo Paulus laok iin tuun, lako ua. Laok iin deng Korintus laok Patara

14Kaim tutnaal Paulus se kota Asos kon, un sake muid deng lui dapa kon, le kaim luan laa napiut lakom kota Metilene. 15Deng kota Metilene, kaim lail napiut. Kon nam ola ka, kaim lail dadani nol nusa mesa, ngala Kios. Bingin dua ka, kaim lail saol nusa Samos. Bingin tilu ka halas-sam, kaim lakom lius se kota Miletus. 16Mo Paulus kom isi le lalaba pait lako Yerusalem, halin un muid leol tene Pentakosta se lua. Undeng na le un dai soleng oras in saek laok kota Efesus lo.

17Tiata nikit Paulus bii se kota Miletus kon, un tunang dais bel blalan-blalan Kristen in se kota Efesus sas, le oen maa tutnaal nol un se kota Miletus. 18Nikit oen maas lius kon, Paulus tek oen noan, “Kaka-paling totoang. Mi totoang taan auk in nuli ki son, deng hmunan auk kida iing ngi se propinsi Asia, maa lius leol neot nia. 19Mi kon tana noan, auk daek mumuun se mi hlala ka, mo auk nikit tatahan auk apang ngi lo. Se auk in dake kia, auk matang uin nahi oe mamo son, nol lepa-haal in susa bubuit lo. Auk kon haup susa-daat mamo deng atuil Yahudi las in tao dadaat saol au ka. 20Dedeng auk tui mia ka, auk puting totoang dais banan, man auk in tana ngas bel mia. Nol auk kon tui mi nol in buni-buni lo. Auk kon lakong se atuli las uma las mesa-mesa, le tekas pait deng Ama Lamtua in koma ka. 21Auk kon tek atuil Yahudi las, nol atuil Yahudi lo kas noan, oen musti tenes deng oen in kula-sala ngas, le muid se Ama Lamtua Allah. Nol oen kon musti parsai se Yesus, kit Lamtuan na.

22Auk le tek mi elia: auk kom le lakong Yerusalem, undeng Ama Lamtua Koo Niu ka, le nol auk lakong se luang. Auk taan le mam asa man daid nol auk se lua ka lo, mo auk muid tukun. 23Mo deng kota mesa laok kota mesa, Ama Lamtua Koo Niu ka tek auk muna son noan, mam auk tamang bui, nol lepa-haal susa-daat mamo. 24Auk tanan son le baktetebes ela, undeng Lamtua Yesus man kom le bel auk lepa-haal in dake nia. Le halin laok tek atuli las deng Dehet Dais Banan na noan, Ama Lamtua namnau kita, nol Un kon tulu Un dalen banan na bel kita. Eta auk tao muid Un in koma ka, le daek nuli os ni lo kam, auk nangan nam auk in nuli ki muik nahin lo.aTimutius dua la 4:7

25Halas-sam auk tana noan, mi man auk in tui nesang son, le tamam daid Ama Lamtua nenan nias, mam net auk pait lo ka. 26-28Undeng na, tiata hii babanan ne. Auk os in daek taung mia ka, auk daek nuli son. Tiata mi esan man musti daek napiut. Eta muik atuil deng mia la, tama daid Ama Lamtua nenan lo kam, mi man lepa-halan. Ta na auk in kula lo. Nangan babanan ne! Auk tek mi meman son, deng totoang Ama Lamtua in koma ka. Auk buni tahan dasi mes deng mi lo. Tiata mi esan musti doh mi in nuli ka babanan, nol doha-tinang babanan totoang atuil man Ama Lamtua Koo Niu ka in tadu mi le doha ngas. Nadidingun deken, ta Lamtua Yesus mate le sui-nahat hidi atuil nas son, nini Un dala ka esa. Un kon tulu mia, le halin mi doha-tinang one, banansila el atuil in lolo-poa, doha-tinang un lae-blai las sa.

29Tiata halas ni auk le nang soleng mia. Mo nangan ne! Mam muik atuli maa le tui dadahut tuun se mi hlala kia. Oen taam maas banansila el ngot in sau daat, man tama lako okat lae-blai la dalen na. 30Muik atuil in nole-lilung daat deeh maas deng likun, mo nangan, ta muik teng kon puit maas deng mi hlala ka. Hidim oen tui mi nol in tom lo. Oen kom le atuli li muid se oen tukun. Tiata oen soba-naan le liun atuli li halin muid se Lamtua Yesus pait lo. 31Undeng ela, tiata mi musti doh apan babanan. Nadidingun deken, ta auk daad leo-leo nol mi taun tiul son. Auk kon tui-tikang mi lelo-duman nol nangan auk in kae ka lo. Auk matang uin nahi oe-oe son, undeng mia.

32Kit le bakisan apa son niang. Tiata auk sao mi totoang lakom se Ama Lamtua ima, le halin Un man papa-paiduil mia. Nol mi musti kil dididi totoang man auk in tek mi son lolo hmunan nua, deng Ama Lamtua dalen banan na ka. Ama Lamtua muik kuasa le bel mi in kuat-tes. Un kon hid son le bel hangun se Un atulin nas. Tiata eta mi muid napiut se Una nol dalen in niu kam, taon elola ko mi kon haup hangun.

33Dedeng auk daek se mi hlala ka ka, auk kom le kat mi sa-saa mes lo kon. Auk nodan net lil-mea, lil-muti, kai-batu, tamlom asa tukun deng mi lo! 34Mi kon tana noan, dedeng auk daad nol mia ka, auk daek hiti-late, le taung auk in nuli lelo-lelon nia. Suma taung auk siing tuun lo, molam taung atuil man in muid au ngas kon. 35Tiata, deng totoang dais nias, auk tulu bel mi lalan son, le halin nam mi kon hulung atuil kasiang man muik saa lo ngas. Nangan babanan Lamtua Yesus in tek son noan, ‘Kit bele lam banan dui deng, kit simu’ ka.”

36Paulus dehet hidi ela kon, un hai buku ka, le kohe-kanas leo-leo nolas. Un nodan le halin Ama Lamtua doha-tinang oen totoang. 37-38Kon nam oen totoang dalen iil isi, undeng Paulus tek son noan, mam oen tutnaal un pait lo ka. Tiata nikit oen le bakisan apa kon, oen neok Paulus le likin, hidim lilu muun isi nol dael ili. Hidi nam, oen nol kaim laok sao kaim‡“Kaim” in mo bango nia ki Lukas (atuling man in dul surat ni kia), Paulus, nol un tapan nas. se onan na le kaim saek lui lakom.