101Hidi kon Yesus haman Un ima-ii las le maas nakbua. Kon Un beles kuasa le nulut uikjale, nol tao banan atuli las deng oen ili koed-ngasing ngas. 2Ima-ii at hngul dua man Un in nutus sas ngalan nas elia:

5-6Hidi nam Yesus nutus Un ima-ii las hngul duas, nol beles prenta noan, “Auk nutus mi lakom se kit atulin Yahudi las, undeng muik atuli mamo deng one la muid Ama Lamtua lalan na nol baktetebes lo. Oen banansila el lae-blai man in liu ka. Undeng na, tiata mi laok se atuil Yahudi lo kas deken, tuladang el atuil Samaria las. 7Molam laok le tek kit atulin Israel las noan, ‘Oras sa maa lius son, le atuli li totoang bisa tama daid Ama Lamtua Allah atulin.’ 8Nol laok tao banan atuil man in haup ili ngas, tao atuil in mate ngas le nulis pait, tao banan atuil in iil baih-bluku ngas, nol nulut puting uikjale kas. Ama Lamtua bel mi in hapu mamamo son, mo Un nodan pait mes lo kon. Tiata mi musti laok bel atuli las mamamo deng mi in hapu ngas, mo boel nodan pait sa-saa deng oen deken. 9Lako lam kil sa-saa deken ne. Kil duit deken, 10kil in kaa se lalan deken, kai-baut in silu deken, nahan tamlom mo hnikan deken. Ta atuli li musti bel asa man atuil in dake ngas in parlu ngas, le halin oen nulis.aKorintus mesa la 9:14, Timutius mesa la 5:18

11Eta mi tamam se kota mesa, tamlom ingu mesa lam, nuting atuil in tade le sium mia ngas. Hidim daad se na didiin, mi bok lakom deng maan na. 12Eta mi taam lakom se atuli mes uma kam aa noan, ‘Boa-blingin! Ama Lamtua bel mi hangun.’ 13Eta atuil in se um na ngas sium mi nol babanan nam, mi nodan le Ama Lamtua beles hangun. Mo eta oen sium mi lo kam, Ama Lamtua kon beles hangun lo. 14Eta atuli dai hii-ming se mi lo kam, putim deng iung na, tamlom kota na, hidim sii soleng auh in se mi iin na ngas, le daid tada noan, oen dai hii-ming se mi lo, tiata oen lepa-haal oen in kula-sala ngas esan.bDehet deng Aan in Nutus sas 13:51 15Mam eta Ama Lamtua Allah nahu hukung bel atuil in se apan-kloma ki ngias sam, taon elola ko, Un nahu hukung ngele bel atuil Sodom nol Gomora las, man hmunan nu in daat isi ka. Mo nangan ne! Ta mam Un nahu hukung ngele dui pait, bel atuil man in dai sium mi lo ngas!”cLukas 10:4-12, Matius 11:24, Dehet deng Apan-kloma ki in Dadi ka 19:24-28

16“Nangan ne! Ta Auk in nutus mia ni, banansila el Auk nutus lae-blai lako se ngot huin in daat isi ngas hlala. Undeng na le mi musti pake kutan, banansila el ula in nuting taan lalan na, nol mi dalen nas musti niu, banansila el korkifi ka in nuli nol babanan na.dLukas 10:3 17Mo doha-doha lo! Ta mam atuli tao mi le bosor isi, tuladang el ngot huin in sau tele lae-blai ka. Mam oen pel nol mi lakom se maan in nehan dais agama kua. Nol mam oen diku-puang mi se uma-um in kohe-kanas sas. 18Mam oen pel nol mi lakom ngada se gubernur ra nol lahing nga, undeng mi in muid Au ka. Mo mi musti pake dola na, le tek oen deng Auk Dehet Dais Banan na. Nini ela lam, atuil man taan Ama Lamtua lo ngas kon, ming haup dehet deng Au. 19Mo eta oen pel nol mi lakom ela lam, mi lii deken noan, ‘Lakom auk aa noan saa? Tamlom auk siut elola la?’ Nangan le lii ela deken, ta lius un oras sa lam, mi Aman in ne sorga ku tek bel mi in aa elola ka. 20Oras na lam, asa man mi in aa ngas maas deng mi lo, ta Un Koo Niu ka man tui mi le aa elola.eMarkus 13:9-11, Lukas 12:11-12, 21:12-15

21Mam mi tinang esan tuun, tiam se uma mes dalen, eta muik atuli in parsai se Au kam, un kaka-palin nas esan man nuting lalan le keo tele una. Hidim etan ana mes man parsai se Au lam, mam un ama ka esa man keo una. Eta ina-aman nas parsai se Au lam, mam oen anan nas esan man keo tele one.fMarkus 13:12, Lukas 21:16 22Ngat te, ta mam totoang atuli li kom mi lo isi, undeng mi in muid Au ka. Mo atuil in tahang napiut didiin hidi ka, mam Ama Lamtua Allah belen boa-blingin.gMatius 24:9, 13, Markus 13:13, Lukas 21:17 23Eta atuli tao mi dadaat se kota mesa lam, lail lakom se kota didang. Auk in tek mia ni toma, mam mi laok papmes totoang kota in se Israel lias lo bii, mo Au, Atuling Baktetebes ni, pait maang son.

24Auk niam mo mi Gurun nol mi Tuang. Taom atuli todan guru mes dui deng un ima-ii las. Nol oen todan tuang mes dui deng un anan in dake ngas.hLukas 6:40, Yuhanis 13:16, 15:20 25Eta ima-ii las tui, le oen in tana ka tatai nol oen gurun na son nam, oen nataka kam nola. Nol eta atuil in dake ngas tui, le oen in tana ka tatai nol oen tuang nga son nam, oen kon nataka kam nola.

Tiata nangan ne! Eta atuli noken Au, man daid um lamtua kia, noan, ‘Ku niam Balsebul, uikjale kas laih tuan na!’ Lam salolen nol mia, man daid um isin nas sa, taon elola ko mi ngalan nas daat dui pait.”iMatius 9:34, 12:24, Markus 3:22, Lukas 11:15

26“Tiata mi lii nol atuil in labang mia ngas deken. Ta asa man atuli li in dakes buni-buni ka, mam atuli li totoang ngat netas.jMarkus 4:22, Lukas 8:17 27Asa man Auk in tui mi siing-siing nga, mam mi musti laok tek totoang atuli lia. Nol asa man Auk tek mian ete-ete ka, mam mi musti laok papmes totoang ingu-mana las le tek atuli las. 28Lii atuli li deken, ta oen suma tao tele nal atuli li aap-sisin na tukun, mo oen tao tele nal atuli li hmangin lo. Tiata mi musti lii se Ama Lamtua Allah, ta suma Un sii man muik kuasa le piul tamang atuli li aap-sisin na nonool hmangin na, lako tasi ai man kaloe hidi nutus taan lo ka. 29Tao tes mi dalen nas. Atuli hee kee ael se pasar, nol osa bubuit tuun. Mo muik tahan mes lo kon man nahi le mate, eta mi Aman in ne sorga ku, tade lo. 30Mi Aman in ne sorga ku kon ngat mia ka, lako pes sa-saa anang blutu kas. Mi klangan in ne mi bon nas kon, Un taan hidis. 31Tiata mi lii deken! Undeng Ama Lamtua Allah in sukat mia ka, osa dui deng kee ale las totoang.”

32Hidim Yesus aa pait elia, “Atuil in lii lo, le hao Auk se atuil hut mamo in ne apan-kloma ki ngias silan na, mam Auk kon hao un se Auk Amang in ne sorga ku sila, noan, ‘Un nam, Auk atulin.’ 33Mo atuil in kaen Auk se atuil hut mamo silan noan, un taan Auk lo ka, mam Auk kon tek Auk Amang in ne sorga ku noan, ‘Auk taan atuling ni lo.’”kTimutius dua la 2:12

34“Mi bali noan, Auk maang nol kil in dame se apan-kloma ki deken. Ta Auk maang le tao atuli li labang apa mes nol mesa. 35Auk maang se apan-kloma kia, muid asa man Ama Lamtua mee-baha las in tek meman son noan,

37Tiata atuil in tade baktetebes le muid Au ka, musti namnau Auk dui deng totoang; dui deng un ina-aman nas, nol dui deng un anan nas. Ta lo kam, atuling na tatai in daid Auk atulin lo. 38Undeng atuil in tade le muid Au, mo dai lepa-haal in susa-daat lo ka, tatai in daid Auk atulin lo.mMatius 16:24, Markus 8:34, Lukas 9:23 39Ta atuil man tade le mate undeng in muid Au ka, mam un haup in nuli napiut nol Ama Lamtua. Mo atuil in suma kom le nuil taung un apa ka sii ka, mam un haup in nuli napiut nol Ama Lamtua lo!”nMatius 16:25, Markus 8:35, Lukas 9:24, 17:33, Yuhanis 12:25

40“Atuil man sium mi nol babanan nas, kon sium Au. Nol atuil man sium Au ngas kon, sium Ama Lamtua Allah man in nutus Au ka.oMarkus 9:37, Lukas 9:48, 10:16, Yuhanis 13:20 41Eta atuli sium Ama Lamtua Allah mee-baha mesa, undeng mee-baah na aa deng Ama Lamtua, lam mam Ama Lamtua balas una ka, banansila el Ama Lamtua in balas mee-baah na ka kon. Nol atuil in sium atuling dael lolo mesa, undeng atuling na muid Ama Lamtua in koma ka baktetebes sa, mam Ama Lamtua balas una ka banansila el Un in balas atuling dael lolo na ka kon. 42Atuil in sium atuil ana ngas undeng oen in muid Au ka, taon elola ko Ama Lamtua balas una. Atuli li suma beles ui muti klas mes sii kon no, Ama Lamtua Allah nadidingun lo.”