Usif Jesus nalekoꞌ atoin amenat nateef nok neno snasat
(Mateus 12:9-14; Lukas 6:6-11)
1 Oke te, Jesus nfain neem antein mbi uim onen. Mbi naan, In niit tuaf es leꞌ in niman bian nmaat. 2 Mbi nane msat, nmuiꞌ atoni bian naim lalan he nasanat Jesus. Ma sin nail piut Ee, he nahiin In he nalekoꞌ atoni nane mbi neno snasat, ka aiꞌ kah. Fun natuin tanhaiꞌ plenat mbi neno snasat.
3 Oke te, Jesus noꞌen leꞌ atoni ꞌniim amates nane mnak, “Ho oum he mhaek mbi matan ii.”
4 Ma oke te, In ntoit neu leꞌ toob ok-okeꞌ mbi nane mnak, “Kalu mituin hai plenat akama, hit nabeiꞌ tmoeꞌ saaꞌ-saaꞌ nok neno snasat? Nabeiꞌ hit taleko, ka aiꞌ kah? Nabeiꞌ hit talekoꞌ atoni, aiꞌ taꞌmate atoni?” Mes sin ok-okeꞌ naꞌmaetso kah.
5 Nalali te, Jesus In neekn aa ntuuꞌ, fun sin neek in nloem he natuin sin aplenat, ma ka nlois naan fa leꞌ atoni ꞌniim amates nane. Ma In natooꞌ ma napiin maatn aa neu sin napuun-nateef. Oke te, In nak atoni nane mnak, “Mnonaꞌ ho ꞌnimam nane neem!” Nalali te, atoni nane nnonaꞌ in aꞌniman, ma suk naskeek, in aꞌniman nane naleok nain kuun. 6 Nalali te, atoni Farisi sin nane mpoi nasaitan uim onen nane. Ma sin nnaon mafuut lasi ma akool nok atoni naꞌko partidu Herodes, he namin lalan naꞌmaet Jesus.
Usif Jesus nalekoꞌ atoni amenat namfau mbi nifu in ninen
7-8 Mbi haef es, Jesus nok In asium-noinaꞌ sin nnaon nasnasan mbi nifu ꞌnaek Galilea in ninen. Mes fun natuin atoni namfau nneen nalalin saaꞌ leꞌ es In anmoeꞌ nani, es on nane, sin ok-okeꞌ neem naꞌko kuan-kuan he natuin Ee. Sin neem naꞌko profinsia Galilea, profinsia Judea, ma nok profinsia Idumea. Nmuiꞌ atoni bian amsat neem naꞌko koot Jerusalem, koot Sidon, ma nok koot Tirus. Ma nmuiꞌ atoni bian amsat neem naꞌko noel Jordan in neno-saen. Sin ok-okeꞌ namin lalan he naꞌeuk nok Ne. 9 Natuin toob namfau, Jesus nleul In asium-noinaꞌ he naloitan beor es neu Ne. In nloem he namolok mbi beor aa tuun, henati sin ok-okeꞌ nnenan, ma In kaisaꞌ nakiimb on, ma he sin kaisaꞌ mbeꞌu Ee.
10 Unuꞌ, In nalekoꞌ nalail atoni amenat namfau. Fun muni ii, atoni amenat namfau, sin neman mabeꞌun es nok es he nlaabn aa Ne.✡ Markus 4:1; Lukas 5:1-3 11 Olas atoni leꞌ pah-tuaf ntaman sin napeen niit Ee, ma sin anluinan ma ntoson huumk in mbi naijaan mbi Jesus In matan. Oke te, sin ankoaꞌ mnak, “Ho leꞌ ii, namneo Uisneno in Aan Mone!”
12 Mes In ntaal maꞌtaniꞌ neu sin mnak, “Kaisa mitoon atoni bian mak, Au leꞌ ii, sikau!”
Usif Jesus mbeit atoni boꞌes am nua he njael In asium-noinaꞌ
(Mateus 10:1-4; Lukas 6:12-16)
13 Nalali te, Jesus ansae neu ꞌnuuꞌf es in tunan. Ma In noꞌen atoni fafauk leꞌ matoom nok In nekan. Ma sin neem neu Ne. 14 Oke te, In nleek nain atoni boꞌes am nua. In nak neu sin mnak, “Au ꞌbeit ꞌain ki, henati hi mituin Kau piut. Au ꞌleul ki, he hi mnao mitonan Uisneno In Laes Alekot neu atoni ok-okeꞌ. 15 Au lof aꞌfee ki kuasat, henati hi mliuꞌ pah-tuaf naꞌko atoni sin nekak naank in.”
16-19 Leꞌ atoni boꞌes am nua nane, sin kaank in on ii:
Simau (leꞌ Jesus nakaanb ee neu ‘Pedru’),
Yakobus,
Joao, (Yakobus nok in olif Joao, sin nua sin leꞌ nane, ꞌnaef Jebedeus in aanh in. Jesus nakanab sin nua sin nak, ‘Boanerjes’, es in aꞌnaonaꞌ namnees ‘on leꞌ ꞌlotos’.)* a: Sulat lasi Gregu (Yunani) nluul nak, ‘ꞌlotos aanh in’, nok in naꞌnaonaꞌ nak, ‘on leꞌ ꞌlotos’. Atoin ahinat bian naneꞌop nak Yakobus ma Joao sin haank in namnees on leꞌ ꞌlotos, aiꞌ sin nloem he namaun on leꞌ ꞌlotos.
Andreas,
Filipus,
Bertolomeus,
Mateus,
Tomas,
Yakobus (ꞌnaef Alpius in anah),
Tadeus,
Simau (leꞌ natuin partidu Selot),† b: Partidu Selot nane, sin namin lalan he sin nhaken mesen naꞌko plenat Roma. Ma partidu Selot nane, nakanab sin partidu nak ‘Patriot’ amsat.
ma nok Judas Iskariote (in leꞌ nane, es naꞌsaꞌu Jesus).
Kulu akama sin nasanat Jesus nak, pah-tuaf in sin ꞌnakaf aꞌnaet es anfee kuasat neu Ne
(Mateus 12:22-32; Lukas 11:14-23; 12:10)
20 Nalali te, Jesus nok In asium-noinaꞌ sin nsanun nfain naꞌko ꞌnuꞌaf nane. Ma sin ntaam mbi ume. Mes toob namfau neman ntool naan anteni Ee, tal antee Jesus sin ka naah nanan fa. 21 Nail niit on nane te, atoni sin nak, “Ati mail miit Jesus feꞌ. In napnikan naloitan In aon.” In huumf ini nneen atoni namolok on nane, es nane te sin neem naneꞌ he nok Ne.
22 Olas nane, kulu akama sin neman naꞌko Jerusalem he natonan atoni mbi nane mnak, “Hoi! Hi kaisa mituin Jesus. Fun nane, pah-tuaf sin ꞌnakaf aꞌnaet, leꞌ atoni biasa noeꞌn ee nak naiꞌ Baalsebul, ntaam nalail neu In nekan, ma nfee kuasat neu Ne he nabeiꞌ nliuꞌ pah-tuaf.”✡ Mateus 9:34; 10:25
23 Jesus nneen on nane te, ma In noꞌen sin ok-okeꞌ mnak, “Ije, ka nmatoom fa nok ꞌneꞌop! On mee, he niꞌ pah-tuaf sin ꞌnakaf aꞌnaet nabeiꞌ nliuꞌ nafain on kuun! 24 Kalu mbi pah es in naplenat, in toob in nmabanan es nok es, on mee henati pah nane nabeiꞌ nhaek nabaal? Ka nabeiꞌ fa! 25 Ma kalu mbi ume ꞌnaakf es in nanan, nmatoen es nok es, mmoeꞌ on mee henati sin ume ꞌnakaf nane nabeiꞌ nhaek piut? Ka nabeiꞌ fa! 26 On nane msat, kalu pah-tuaf nmamusun es nok es, sin nlofan mbait-sokan. Kalu he on nane te, tlof namleꞌun!
27 Kalu atoni nloem he neem nabakaꞌ baleꞌ neu atoin amaspeits es, in musti nfuut naꞌbubuꞌ uim tuaf nane feꞌ. Nalail niꞌ in nabeiꞌ nabaak tuaf nane in aꞌbaleꞌ.‡ On nane, Jesus natoon am nak, In maspeti nneis naꞌko pah-tuaf sin ꞌnakaf aꞌnaet, es leꞌ sin nok neno-neno noeꞌn ee, ‘naꞌ Baalsebul’.
28 Es on nane, Au utonan ꞌaen ꞌeu ki: Uisneno nabeiꞌ he nnoes nain atoni sin sanat. Ma kalu atoni naꞌuab naꞌleꞌuf atoni bian, Uisneno feꞌ nabeiꞌ he nnoes atoni nane in sanat. 29 Mes kalu nmuiꞌ atoni mbarain naꞌuab naꞌleꞌuf Uisneno In Smana Kninoꞌ, Uisneno ka nnoes fa in sanat nane, tal nabal-baal!”✡ Lukas 12:10
30 Jesus nak on naan, fun sin naꞌleꞌuf nalali Ee mnak, “Pah-tuaf antaam nalail es atoni nane!”
Usif Jesus in biak in maneꞌo-maneꞌo es leꞌ sikau?
(Mateus 12:46-50; Lukas 8:19-21)
31 Nalali te, Jesus In enaf nok in oilf ini neem mbi ume nane, ma he naꞌeuk nok Ne. Mbi nae, sin nhaekn aah mbi kotin, ma sin nleul atoni he nnao noeꞌn Ee. 32 Olas nane, Jesus ntook namolok nok atoni namfau. Ma nmuiꞌ atoni neem natoon Ee mnak, “Hoi, Amaꞌ! Ho enaꞌ neem nok Ho oilf ini, neem es kin moneꞌ nae. Sin neem he naꞌeuk nok Ko.”
33 Mes Jesus natae mnak, “Au enaꞌ nok Au oliꞌ-tataꞌ maneꞌo, es leꞌ sikau?”
34 Nalali te, In nail neu atoin in leꞌ ntokon napuun naan Ee. Ma In naꞌuab nak, “Hi ok-okeꞌ leꞌ ii, Au enaꞌ ma Au oliꞌ-tataꞌ maneꞌo-maneꞌo es leꞌ hi. 35 Fun sikau es anmoꞌe natuin Uisneno In aꞌlomin, sin leꞌ nane maneꞌo-maneꞌo Au biak in.”