Leta Kolose de leta ida la'a Asia yapatni mak edon olieta la'a leta Epsus. La' puka Makod lira de (Onni 19) rakot nohora Paulus kniarni la'a leta Epsus la'a anni wotelu. La' ler de makpesiay id de nwawa Epafras. Epafras di nla' pa nakot nohora Kot Kalwieda-Paitiota la'a e mutwualli la'a leta Kolose nhi'nande makden Kolose dom de rpesiay wiali.
La'pa lera wo'ira rlardoin la dewade rkenia Paulus la roma nhio'la ralamni onnila nakot nohora Kot Kalwieda-Paitiot de. La'pa e nden ma'ta la' roma nhio'la ralamni de enatlin nan de riy dom de e rwatutu hya' mak edon kaplola la'a leta Kolose. Irwatutu riwra itler la yamori-yalewna onnila itpesiay me itlernohor walia deulu-tatra sunat ror wutga deulu-tatra doma to'a.
La'pa Paulus natlin nan hade dewade na'enyatga horat di la'a makden hande totpena nhi' aruri ir pesiayni. Yanhi'pa tungkuru mak edon kaplola re rodi ir la talan mak kaklierta. Paulus ntekal reria niwra it pesiayni la'a Yesus nmeh'a ed mak kodi it la yamori-yalewna. Yesus ed mak kohi-ka'ara nohkerna-rai miaran di, me Nodi plolli la'a hare honona mak kdella nohkerna nor utnu-liannu. E' ed maka Uplerlawna Ntutga pa Ntuwu-nhai it la it do'oni-halli ralamni totpena hota itora Uplerlawna tla' ihru ida-ralm ida. Paulus ntekal reria niwra tungkuru mak edon kaplola re wniatutnu nhal wa, yoma nwatiawu rimormiori wniarorni-wnialaini. Paulus nakot nohor wal lia nhioli-lieta wniehwa-liakta mak klol talan pa makpesiay re rhi' nana.
La'a puk di e rakot nohora emkadille:
1. Wniak kalwieda (1:1-2)
2. Paulus nwak kalwieda la'a Uplerlawna yoma makden Kolose re ralam kalwiedni me pesiayni, ne Paulus nsumbaini ira (1:3-14)
3. Paulus nwatutu makden Kolose (1:15-3:17)
Yesus ed makodi plolli la haneka-harahu wawannu. Ne E' ed mak khi' itora Uplerlawna tkalwieda (1:15-23)
Paulus nakot nohora e kniarni maka enakot nohora Kot Kalwieda-Paitiota me nhima-nre'a makpesiay re (1:24-2:5)
Itlernohora wniehwa-liakta mak lol talan pa makpesiay re rhi' nana (2:6-23)
Itolin doinia ita nhioli yatyata, me itsi'a-tyapia mak kla' nana Yesus ralamni (3:1-17)
4. Nnio'a-niatu la'a mak kmehlima, la'a upa-a'na rora ina-ama, me la' walia ata-wa'ara rora upa-matroma (3:18-4:1)
5. Nnio'a-niatu la'a sniumbaini, me wniehwa-liakta mak kaplola pa itsi'a la riy mak edon kpesiay ma'ta (4:2-6)
6. Wniak kalwieda me nnio'a-niatu hohoni (4:7-18)