101Ina-nara ama-hyali, a ralmu nwak toto' memna pa totpena a hairwia'lu Yahudi rimormiorni rlernana mormiori-lewlewna, pede a' muana siumbain rer mamain ir la Uplerlawna. 2Hya' maka ukot di naplola: de Yahudi re irape'el olek pa rhu'ru-rhelam la Uplerlawna deullu-tatarni. Mere raplin niohora talla plollola maka Uplerlawna Nala pa ror E' pa rkalwieda. 3Rtot pa raplinu Uplerlawna ralma-riorni la' emkameni totpena rkalwied owa'ana. Ne iriwra rlernohora ira ralma-rior wamueheni pa ror E' pa rkalwieda, pede ir edonna rreiniana talan maka Uplerlawna Ntut oleka de. 4Mere la'a Yesus Kristus hihi'ini la matmiatni pede riy edon rlernohor owa'ana agama deullu-tatarni totpena ror Uplerlawna rkalwieda. Pa hota la E'a pede riy honona maka kpesiaya re hota rora Uplerlawna mana rkalwied olekwa.

5Ina-nara ama hyali, la'a Musa Pukni ralamni de enhorat targa la'a riy mak kiwra kora Uplerlawna rkalwieda yoma rlernohora agama deullu-tatarni, eniwra: ”Enekneka riy maka edonna kpera-kdaitia agama deullu-tatarni id to' la' mormiorni ralamni nampena nler la mormiori plalahwa pa nodi liarni.” *Imamat 18:5 6Mere la'pa riy maka kora Uplerlawna rkalwieda yoma la'a pesiayni la Yesus Kristus, de ed walia la Puka ralamni de niwra: ”Yana mpiarora-mpialaiya la'a ralammi, hota he' ed maka kler la Ilyamou-Watyatoha,” nnia'eratni de hota he' nodia Yesus Kristus pa Nernu totpa enakot nohora mai ita la kot maka kakot nohora yamori-yalewna. 7Onde: ”He' ed maka hota kerun la noh mati-rai miolu?” Nnia'eratni de he' nma nrana Yesus Kristus la matmiatni ralamni totpena Nakot nohora kot dena. 8Mere Musa nakot neka niwra: ”Kot mak kodia mormiori-lewlewan de edon oliet tiy miy. Hota mpiarora-mpialaiya la miy ralammi de. Me miatu mikot nohora.” †Ulangan 30:12-14 Ne kot de ed maka amakot nohora walia totpa hota mimpiesiaya; de nhi'inde amiwra: 9La'pa miy nurmi nwayow nana Yesus la rira gaini ralamni pa miwra: ”Yesus de Orgahi-Orha'a inhatta,” me mpiesiaya la miy ralammi de Uplerlawna ed maka kamori-kalewna Yesus la' matmiati ralamni, de hota mimliernana mormiori plalahwa. 10Yoma la'a mimpiesiaya la ralammi pede Uplerlawna Nreiniana-na'nana miy pa emeknekama riy maka kora Uplerlawna rkalwieda. Ne la'a nurmi mak kwayow nohora Yesus de Orgahi-Orha'a inhatta pa hota Namori-nalewna miy. 11Ina-nara ama-hyali, itat niohora hade naplola yoma la'a Puka ralamni e rhorat targa: ”La' riy maka kpesiaya de hota edon ramta'ata rha'ar aranni la, yoma hota Enhi' nan maka Enakot targa oleka re.” ‡Yesaya 28:16 12Hota Uplerlawna Ntut momuoga hadella riy honona. E yamkekni edonna to'a-taiya la'a riy Yahudi nor wutga rira dom to'a. Yoma E' de Orgahi-Orha'a inhatta la'a rimormiori honona. E' ed mak ktutu sniayanni pa Nala yara'ani-yapallu narehi-nalawna la'a riy honona maka kwaka tniulla-sniayn la E'a. 13Hade emeknekama e rhorat targa la Puka ralamni de e riwra: ”Hota Orgahi-Orha'a Nala yamori-yalewna plalahwa la he'-he' mak kwaka yamori-yalewan de la' E'a.” §Yoel 2:32 14Mere hota emkameni la riy rwak Uplerlawna pa Namori-nalewna ira la'pa ir edon rpesiay ma'ta la Uplerlawna? Ne emkameni la irpesiaya la Uplerlawna mere ir edon ratlin nohor ma'ta E'a? Ne hota emkameni la iratlin nohora Uplerlawna mere riy edon rmai pia rakot nohora E'a la' ira. 15Ne emkameni walia riy rodi kota la' ira la'pa ir edon rhopan pa rmai? Pede emeknekama e rhorat targa la Puka ralamni de niwra: ”Ha ramuki-rahepur nohora riy mak kmai pia kodia Kot Kalwieda-Paitiota mak kwatiawua Uplerlawna.” **Yesaya 52:7

16Mere Israel duratni-waitni re ratlin nana Kot Kalwied de, mere eneknek to'ama Israel duratni-waitni dom to'a rreiniana-ra'nana Kot Kalwieda-Paitiot de pa rpesiaya. Yoma emeknekama makwohorulu-ktatrulu Yesaya lirni niwra: ”Orgahi-Orha'u ne! Enekneka riy ida-woru rmeh'a er maka kpesiaya a Kot Kalwiedwed mamni di!” ††Yesaya 53:1 17La' hare honona pede itat niohora de riy e rpesiaya yoma iratlin nana Kot Kalwieda-Paitiota la'a Yesus Kristus, maka ha rakot nohor oleka re.

18Mere yanpa plola de Israel re edonna ratlin ma'ta kot de me? Hota edon emkade! Plola ratlin oleka wa. Yoma Puka enakota niwra:

19Mere yanpa hota riy Israel re edon rna'erit nana lira-tunu maka ha ratlin nana rena? Hota edon emkade wali! Ira rna'erit nana yoma Yahudi atia'a nek de rna'erit nan oleka wa. Itat niohora hade yoma Musa ed maka kakot nohor ulga ha yala'ani, de Musa nwahaur nohora Uplerlawna lirni mak kiwra:

20Makwohorulu-ktatrulu Yesaya mana, nparan tioto' meman pa nakot nohora Uplerlawna lirni la'a Israel duratni-waitni atia'a re, niwra:

21Mere la'a Israel duratni-waitni wniahaurnohorni, Yesaya nakot nohora Uplerlawna lirni Niwra: