La' Puk di de Yohansi nakot nohora Yesus Makamori-Kalewna mak Uplerlawna Nano'taru pa Namori-nalewna rimormiori. La' Puk di de Yohansi e nwahaur nohora Yesus, niwra E' de ed mak ha rweta la Uplerlawna Lira Nnio'oni-Wawa Niatnu. Ne nwet wali Yesus la Lelerni. E' ed mak kor rewre'wa Uplerlawna la ler maka Uplerlawna Nohi-na'ar nohkeran di. Mere Yesus de wal pia ed mak kwal lia rimormiori pa Nden wut lia rimormiori la' nohkerna la' ler ho'ke'eni de.
Yohansi mak khorta puk di, de maka Yesus ha Nwatutu-nwaye'a id e'a. Yohansi nhorta Puka di totpena ntekal reria niwra Yesus de Wutmueha-Laimieha, Ray Makamori-Kalewna mak kmeh'a neka Nala mormiori-dardiari plalahwa la rimormiori nohkeran di. It tlernan mormiori warwuaru de onnila it pesiayni la Yesus, me la' E Nhiwni kniarni la it ihranu ralamni mak kamou-kawitna it do'oni-halli honona.
La' ler maka Yesus ed ma't la nohkeran di, de mak ktutrier niohora pa raplol nohora E'a ed olek wa, emeka Yohansi makharani lirni, Uplerlawna lirni, me hihi'a-yapyapi mak kamehi-kayona mak Yesus Nhi' nana re totpa Ntutga Uplerlawna rurni-laini. Mere emkade ho'mana riy harahu la' ler de edon rpesiaya. Rerehniana o'ta-mata Yahudi mak kahmen memna rpesiay lia E'a. Mak klernohor reri dom to'a wali rhoitio'or doin E' pa edon rlernohora owa'ana. Mere la' he' to' mak kpesiay lia' E' de Enala mormiori-dardiari plalahwa pa nodi liarni.
La' Puk di de e rakot nohor emkadille:
2. Rakot nohora Yohansi makharani me riy maka Yesus ha Nwatutu-nwaye'a re.
(1:19-51)3. Yesus Nhi'a hihi'a-yapyapi mak kamehi-kayona. (Onni 2-12)
4. Itmatromlawanni Yesus wniatutnu-wniaye'eni (Onni 13-17)
5. Yesus Nmat lia auwlakar hananni mere Nmori owa'an la' lera wotellu (Onni 18-21).