Riy makpesiay la'a ululu de riwra riy id mak kwawa Markus ed mak khorta puka di. Markus di nhi'inde nor wutga Petrus rla pa rakot nohora Uplerlawna Kot Kalwiedni-Paitiotni la'a meni-meni. Noma Markus nhorat targa Petrus lirni de la'a Puka di ralamni. Enakot nohora Yesus hihi'ini-yapyapni me wniatutnu-wniaye'eni. De e nwahaur nohora Yesus Nla' pa Nakot nohora Uplerlawna Kot Kalwiedni-Paitiotni la'a emkameni Uplerlawna hota Nodi plolli la'a rimormiori emeka ir Rayni (1:14-15). Enwahaur wali la'a Yesus Nodi plolli pa Nhi' kalwieda riy mak kanieni-kahniena me riy maka hegana-kawnu rhu'ru ralma. Mere ina-ama Yahudi rwayotlia Yesus me riwra rwunu-rwenna (3:6). Emkade ho'mana Yesus edon Nawlar lia kniarni mere Nakot nohora neka hota rwunu-rwenn E'a (8:11; 9:31; 10:33-34) Enla'awa Yerusalem yoma Nlernohora Uplerlawna wniarorni-wnialaini totpa Nal inonni pa Nhi'a hopopa-hegeuru hoihoi-tantiani pa Ntuwu-nhaiya rimormiori la'a do'oni-halli re (10:45). La'pa lera wotelu rlardoinla dewade Nmori owa'an la matmiatni ralamni.
Markus nhorta puka di totpena ntekal reria niwra Yesus de Ray Makamori-Kalewna maka Uplerlawna Nano'taru inhatta, de Uplerlawna A'nani Wutmueha-Laimieha (1:1,11, 24; 3:11; 5:7; 8:29; 9:7; 14:16-62; 15:39) Markus wniarorni de totpena Nhedu-ntehra ita totpena yan itawlar lia it pesiayni la'a Yesus (8:34-38; 10:29-31)
La' puk di de rakot nohora emkadille:
1. Yesus Nwaga kniarni (1:1-13)
2. Yesus Nwatutu me Ntutga plolli-mneheni la'a Galilea (1:14-6:13)
3. Riy maka Yesus ha Nwatutu-nwaye'a re rna'erit nana Yesus de Ray Makamori-Kalewna maka Uplerlawna Nano'taru inhatta onnila ramkek nana E hihi'ini-yapyapni la'a Galilea (6:14-8:30).
4. Yesus Nla'awa Yerusalem totpena rwunu-rwenn E'a la hande (8:31-10:52)
5. Yesus hihi'ini-yapyapni wniatutnu-wniaye'eni la' Yerusalem (11-13)
6. Rtorna Yesus la'pa rwunu-rwenna (14-15)
7. Yesus Nmori owa'ana (16)