181Lera ida ne Abrahama namtatan reria la hoiwiali nhiarni gaini la'a ora-au Tarbantin no'a Mamre genni onni, de lera nwawuau ro'onni. Noka Orgahi Ntutga rupni la, de 2Abraham nran gaini, namkek nana riy wotelu rtutrier lia gaini ralamni. Namkek nana dewade nawlar pia ntawu hoiwiali nhiarni gaini pa nla nwatroma re, noka nwaltiora-nwaltiemna.

3Noma niwra: "Am miy re, la'pa ralammi nal a'u die, awuak de yana mtio'or mai a'u. 4Pena rala gera oke' pa mialla miohma doin lakmi la, pa tren kuku' la au di nayanni. 5Mai pia temnu pleini pa miruri-milai owa'ana nhor nianpena mila' pa miodi liarmi. Miy mmiai olek la gen di pa aghoi-tiania miy."

Rwahla riwra: "Ampayowa."

6Noka Abrahama plet pa nla'awa hoiwiali pa nwatroma Sara pa nakot la: "Sara, mua'ala wetra' hota sak ida mak samomuou. Plet pa mriahmia la rot piopo'ola."

7Noka Abraham nawlar tiemna nhiurni-wnia'anni re, noma na' nana sapi a'na molmola ida, pa nala la hopopanni re riy ida, noka pleta-plet pa nwenna na'nama ntunu-nahaga. 8Nhor nioka Abraham na'ala uhu tiuru mak kami'na me uhu tiuru mak kmilu na'itar wutu sapi a'na, noka nhoiya la hare gaini. Me Abraham ntutrier niohora re la'a au nayanni, de e rara'an reri.

9Noka ratiana Abrahama riwra: "O hapmu etla meni?"

Noka Abrahama niwra: "Etla hoiwiali nayanni."

10Noka Orgahi Nal lirni: "Mhoratreria me! Hota Amuai owa'an la anin li'iru pa itwatroma, de hapmu hota nmor nian muanke'a ida olekwa."

Ne Sara e natlin reria la'a nhiar miak della Abraham to'orni. 11Mere Sara nora Abraham rhamto'a-rhape' wal wia, ne Sara mana edon nlernan oleka karorta-kdeh wal wia. 12Pede Sara namali ne ralamni niniha pa nwarora: "Agora Abraham mhamto'a-mhape'ewa ne hota a'u'a'na emkameni?"

13Noka Orgahi Nhar lirni la Abrahama: "Nihya'pa Sara namali pa niwra: "Plola pa hota a'u'a'na, mere aghape' olekwa?" 14Hya' to' maka rimormiori ta'eni rhi'a de, Orgahi Nhi' nana. La'a ler maka Aget tiarga de, anin li'iru, A'uwali owa'an pa itwatrom de Sara nmor nian a'na muanke'a ida olekwa."

15Mere Sara nreher doinia, niwra: "A'g edon umali." Yoma namta'ata.

Mere Orgahi Niwra: "Edonna, omumal tioto'a!"

16Noka riy mantetelu re rwaran la gen die, ne ramkek la leta Sodom. Ne Abrahama nala' wut lia re pa nod niohora. 17Noka Orgahi-Orha'a Nwarora: "Nhi'pa A'ude'a la Abraham, hota Awueyata Sodom letni me yana? 18Samounu de A'ukot nohora hadilla Abraham yoma Abraham di nla' nana hair lalawna mak kodi plolli-ktaryatnu, ne tototni-rerieini pa rimormiori nohkeran di wawannu rlernana ra'a-palu. 19Awualir nian Abraham oleka wa, totpa nhopna duratni-waitni, totpa rlernohora talan mak Atiut tiarg oleka, de rhi' nana plola-mneha, ne totpa A nnio'u de ntutu-nte'ela Abraham (nor wutga duratni-waitni). Hade pede A'ukot nohora hya' maka Agiwa ghi'a di."

20Nhor nioka Orgahi Nhar lirni: "Abraham! Plola pa riy rahu rpolpuolu-rwakwak mai A'u die, riwra, riy mak kdella leta Sodom nora Gomora do'oni-halli werat rehia. 21Pede Amueh'a gerun pa A'umkek memna totpena Agat niohora de, plola pa hihi'ini-yapyapni nhiolli-lietni emolmolla maka riy rakot la mai A'u, me edonna."

22Noka riy maroro'a re rhoitio'or la hande wa pa rala' pa rokru Sodom, mere Abraham naprir rier mia'ta la Orgahi gaini. 23Abrahama nma nrehgor pua niwra: "Matromlawnu ne! Plola pa hota Omkuh dioinia-mhuo'or doini riy plollola ra'itar wutu mak khi' do'a-kyap hiala? 24Emkameni la'pa riy plollola terampwolima mak erla let de ralamni? Plollola pa hota Omkuh dioini-mhuo'or doini gen diella, ne edonna Mual targa yariwa-yahai la, onnila riy plollola teram matlimlimni mak kdella ralamni? 25Olie'tu la hihi'a-yapyapia mak emkade, Mpuenan wutu riy dodo'a-halala rora riy plollola-mneneha, nhi'nande mak kaplola re emekwali mak khi' hala! Olie'tu la hihi'a-yapyapia mak emkare tiy O'a! Yanhi'pa O' mak ktorna watghudi lokarni-tatiaili lahannu la noheri woru-lyanti nayanni edonna Muodi plollolli pa Mukmua?" *18:25 Watghudi lokarni-tatiaili lahannu

26Orgahi Nhar lirni: "La'pa Aliernana riy plollola terampwolim la Sodom ralamni, de Agho' li'mu me Ariei ro'ru la gen die tetema, onnila hare."

27Abrahama nwahla niwra: "Plola pa a'g e ghi' parania ino'nu pa ultier wut lia Orgahi, emkameni ho'mana koda-awu a'u. 28La'pa nho' nana riy wolim la riy teram matlimlima mak kaplola rde, hota Mpueyata-mpuaniawua let de onnila riy matlimlima rena?"

Lirni: "A'g edonna wueyata-wuaniawua, la'pa Aliernana terampwogata wehrani wolim la hande."

29Abrahama nhauri owa'an lirni pa nakot la: "La'pa Omliernan to'a terampwogat la hande de?"

Lirni: "A'g edonna wueyata-wuaniawua, onnila teram mandadatni re."

30Lirni owa'ana: "Yana Matro'mu Nawunu-nawenan mai a'u, la'pa a'ultier nian ralamni owa'ana. La'pa Omliernan to'a terampwotel lia hande de?"

Lirni: "A'g edonna ghi' nan emkade, la'pa Aliernana teram mantetellu re la hande."

31Lirni: "Plollolli de, aghi' parania ino'nu pa ultier wut lia Matro'mu. La'pa Omliernan to'a terampwor lia hande de?"

Lirni: "A'g edonna wueyata-wuaniawua, onnila teram maroro'oni re.

32Lirni: "Matro'mu yan Nawunu-nawenan mai a'u la'pa a'ultier nian ralamni to' owa'an di pa onanwa. La'pa Omliernan to'a termid la hande de?"

Lirni: "A'g edonna wueyata-wuaniawua, onnila teram memeheni de."

33Noka Orgahi Nla'awa, la'pa Nahor dioinia lirni la Abrahama. Ne Abraham mana nawal pia nla'awa genni-tienni.