Surat Tesalonika dua la
Dedeng Paulus nol tapan nas bok putis deng kota Filipi ka, oen lakos napiut le lius se kota Tesalonika. Oen daad tahang se las minggu tilu, kon un tui atuil Yahudi las deng Lamtua Yesus. Tenga las sium oen in tui ka, mo tenga las sium lo. Ela kon no, muik atuil Yahudi lo deeh sium un in tui ka. Mo tene-tene deng atuil Yahudi las hode-lokot atuil hut mamo kas le tao lobo-lau, tiata bole tam boel lom Paulus boka lako kota Berea. Hidim un lako napiut se kota Atena. Ngat se Dehet deng Aan in Nutus sas 16:38; 17:15. Undeng Paulus daad nesang lo se kota Tesalonika, tiata atuil man halas-sam parsai babalu ngas nangan taan deng Ama Lamtua nol babanan lo bii. Undeng na le Paulus dul surat Tesalonika mesa la, halin tui tapnaeng one. Ela kon no, muik atuli deeh nangan taan lo nabael deng Lamtua Yesus in pait maa kia. Tiata nal bulan ila lo kon Paulus dul tapnaeng surat Tesalonika dua la na.

Asii man dul surat nia? Dulan se ola ka? Nol dulan blingan na?
Surat Tesalonika dua la man tek noan Paulus esa man dul surat nia (1:1; 3:17). Silas nol Timutius kon dul hulung (1:1). Muding atuil in tana ngas sam Paulus nol Silas duas Timutius dul surat Tesalonika dua la nataka le se taun 51-52M, dulan se kota Korintus.

Tasao le Paulus dul surat ni lia?
Undeng atuil in parsai se kota Tesalonika ngas taan le mam Lamtua Yesus pait maa kam in daid elola ka lo bii (2:1-2). Tenga las tek noan un pait maa son. Tenga las tek noan nesang lo ka kam Lamtua Yesus pait maa tiata oen daek lo son (3:6; 11-12).

Buk ni tek deng asa la?

Paulus tui-tikang dasi tiul bel atuil in parsai se kota Tesalonika:

  1. Taon elola kon oen haup in susa-daat bili-ngala undeng oen in muid Lamtua Yesus sa. Mo oen musti tahang dididi se oen in parsai ka. Mam Ama Lamtua Allah bel boa-blingin nol balas atuil in tao oen dadaat tas (1:4-12; 2:13-15).
  2. Lamtua Yesus in pait maa ka, mam daid tuladang elola la? (1:7-10; 2:1-12)
  3. Osam daat deken nol nulim nini atuil didang dala-lating deken (3:15-16)
Paulus kon dul deng bango man in tek deng oras kit in nuli ki nahtom susa-daat, nol dul deng Lamtua Yesus in pait maa kia. Undeng na le kaim kohe-kanas duman-leol bel mia le halin Ama Lamtua Allah noken nal mi le daid Un atulin in toma. Kaim kon nodan le Un bel mi Un kuasa la halin mi daek nal totoang asa man banan muding mi in nutus le dake ka nol muid mi in parsai ka. Eta mi lalan in nuli ka ela lam mam atuli li nikit sakeng Lamtua Yesus ngala ka lapa-lapa nol mi kon haup in naka undeng mi in muid una ka. Nias totoang mam dadi undeng kit Aman Lamtua Allah nol kit Lamtuan Yesus Kristus dalen banan na (1:11-12)

Buk ni dulan mudi-muid apa ka elola?
1. Paulus sai un surat ta1:1-2
2. Paulus nodan mamo-mamo undeng oen tahang nal se in susa-daat dalen1:3-12
3. Muik in lobo-lau puit maa muna halas-sam Lamtua Yesus pait maa2:1-2
4. Atuil in parsai kas musti tahang didi2:13-17
5. Paulus nodan le oen kohe-kanas bel una3:1-5
6. Atuil in parsai ki osan daat deken/nonos deken3:6-15
7. Paulus hep un surat ta3:16-18